Allahın Rəsulu (Ona Allahın salavatı və salamı olsun) dedi: "Sizə Ramazan ayı təşrif buyurub. Bu mübarək ayda Allah sizə oruc tutmağı əmr etmişdir. Bu ayda cənnətin qapıları açılar, cəhənnəmin qapıları isə bağlanar. Azğın şeytanlar zəncirlənər. Bu ayda elə bir gecə var ki, min aydan xeyirlidir və kim bunun xeyrindən məhrum olarsa, həqiqətən də o məhrum qalmışdır."

Ramazan ayında müsəlmanlar oruc tutmaqla, Quran oxumaqla, Allahı yad etməklə, müxtəlif saleh əməllər etməklə və gözəl sözlər söyləməklə məşğul olurlar. Ramazan qapılarımızı döyür və carçı səslənir: "Ey xeyir istəyən, davam et. Ey şərr istəyən, geri çəkil." Elə isə bu çağırışa cavab verin, ey Müsəlmanlar!

Ramazan insanın ömür hekayəsində özünəməxsus bir yer tutur. Bu ayda gecələrini namaz qılmaqla, dua etməklə, gündüzlərini isə oruc tutub Quran oxumaqla, sədəqə verməklə, qohumluq əlaqələrini saxlamaqla, elm əldə etməklə və saleh əməllər etməklə keçirən kəs həqiqətən də nemətə nail olmuşdur.
Saleh əcdadlarımız, Allah Rəsulunun (Ona Allahın salavatı və salamı olsun) silahdaşları və haqq yolunda onlara itaət edənlər Ramazan ayına böyük diqqət yetirmiş və Ramazanın gəlişi münasibətilə çox sevinirdilər. Onlar Allaha dua edərdilər ki, gələn Ramazanı görmək üçün onlara yaşamaq nəsib etsin. Daha sonra isə Allaha dua edərdilər ki, etdikləri oruc və ibadətləri onlardan qəbul etsin. Onlar Ramazan oruclarına xələl gətirəcək, batil edə biləcək hər bir şeydən və yaxud boş-boş, mənasız söhbətlərdən, əylənmək, qeybət qırmaq, söz gəzdirmək və yalan danışmaq kimi orucun savabını azaldacaq əməllərdən onu qoruyub hifz edərdilər. Kasıblara və miskinlərə, ehtiyacı olanlara sədəqə verməklə onların qeydinə qalar, onlarla xoş davranar, onları yedirdər və iftara dəvət edərdilər. Onlar islamın düşmənlərinə qarşı vuruşardılar ki, Allahın Kəlamı uca olsun və bütün din Allaha aid edilsin. Böyük Bədr döyüşü Ramazan ayının 17-də baş vermişdi. Bu döyüşdə müsəlmanlar düşmənləri üzərində qələbə çalmışdılar. Məkkənin Fəthi Ramazan ayının 20-də gerçəkləşmişdi. İnsanlar o vaxt Allahın dininə dəstə-dəstə daxil oldular və Məkkə İslamın mərkəzi oldu.

Ramazan ayı tənbəllik və yatmaq ayı deyil, əksinə bu ay ibadət və əməl etmək ayıdır. Odur ki, bu ayı sevinc və fərəh hissi ilə qarşılamalı və bunu qeyd edərək, ehtiram göstərməliyik. Allah təala bu ayda oruc tutmağı bəndələrinə fərz etmiş, bu ayda Qurani Kərimi nazil etmişdir ki, onları zülmətlərdən nura çıxarsın. Saleh əməllər üçün veriləcək əcr, savabların qat-qat artdığı və insanların dərəcəsinin Allah qatında yüksəldiyi, günahların bağışlandığı belə bir ayda necə sevinməyə bilərik?

Nə qədər ki, yaşayırıq, sağlam və gəncik bu fürsətdən istifadə etməli, hər zaman etdiyimiz günah və pis əməllərdən səmimi bir şəkildə tövbə etməli, Allahın əmrlərinə boyun əymək və qadağan etdiklərindən çəkinmək üçün Rəbbimiz ilə əhdimizi təzələməliyik ki, heç bir var-dövlət fayda verməyəcəyi Gündə və yalnız Allaha səlim bir qəlb gətirərək uğur qazananlar ilə bir səffdə olaq.

Muhəmməd Saleh əl-Münəccid
(mətn qısaldılmışdır)
Cəər Allah, səh.6 "Ramazan Məktubları Məcmusu".

Şərh əlavə et

Adın (mütləq)

E-mail (mütləqdir, ancaq göstərilməyəcək)

Yeni sərhlər barədə mənə xəbər etmək

Yeniləmək

Göndər

Cancel