Sual: Beş yaşında bir bacım var və ona Quran əzbərləməyi öyrətmək istəyirəm. Onunla haradan başlayım və necə?

Cavab: Həmd Allaha məxsusdur. Erkən yaşlarından uşaqları İslam dininə itaət etmək üzərində tərbiyə etmək və Allahın Kitabını əzbərləməyi onlara öyrətmək və onlara təhsil vermək Peyğəmbərin sallallahu aleyhi və səlləm sünnətidir və çox mühüm bir məsələ sayılır, xüsusilə də bizim bu dövrümüz və əsrimizdə.

Lakin bu bir çoxlarının öz uşaqlarına və onların qayğısı altında olanlara qarşı laqeyd yanaşdıqları bir məsələ olmuşdur. Onlar axirətdə uşaqlarına heç bir fayda verməyəcək şeylər vasitəsilə məqsəddən yayınırlar və həqiqətən də bu şeylər (yayındıran vasitələr) onlara zərər verə bilər. Aktyorlar, idman oyunçuları və müğənnilər kimi onların şəxsiyyət modeli olaraq nümunə götürülməsi bir yana qalsın, adlarının belə zikr olunmasının layiq olmadığı həmin kəslərə uşaqlar emosional cəhətdən bağlana bilərlər.

Biz bacımızın belə bir sual ilə müraciət etməsini yüksək təqdir edirik və Allaha dua edirik ki, onu dində sabit-qədəm etsin, bu işdə və digər işlərdə ona yardımçı olsun və onun üçün Qiyamət Günü mükafat versin. Başqa insanları xeyir işlər görməyə istiqamətləndirən və yaxud xeyir işlər görməkdə şərik olmaq, bölüşmək və bu xeyir əməllərin yazıldığı dəftər ilə aləmlərin Rəbbi ilə görüşməkdən daha əzəmətli nə ola bilər ki?

Bu kiçik bacımız və ona Quran əzbəri öyrətmək məsələsinə gəldikdə biz bacımıza aşağıdakı tapşırıqları yerinə yetirməyi nəsihət edirik:

1. Oxunuşu və yadda saxlanılması ən asan olandan başlayın. Məsələn, Fatihə surəsi. Sonra axırıncı cüz. Asan bir şeylə başlamaq daha çətin materiala keçməyə yardım edir. Bundan əlavə namazı öyrənməyə başladığında onun buna həqiqi bir ehtiyacı olacaqdır.

2. Hər gün əzbər öyrəniləcək hissə kiçik olmalıdır. Bundan məqsəd odur ki, uşağın bunu əzbərləməyə gücü çatsın və növbəti hissəni əzbərləmək onun üçün asan olacaqdır. Bu əzbər miqdarı uşaqdan uşağa fərqlənir. Bu həmin uşağın zəkasından və yaddaşından asılıdır.

3. Tez-tez əzbər öyrəndiyi şeyi təkrarladın ki, əzbəri möhkəmlənsin. Yeni bir əzbər olmadan və əvvəlkini təkrarlamadan heç bir günü boş buraxmayın.

4. Hər dəfə – məsələn bir cüzü qurtardığında və yaxşı əzbərlədiyində ona hədiyyə verməklə həvəsləndirin.

5. Həmçinin, birinci özünüz oxuyun və o təkrarlasın. Bu da adətən əzbər öryənmədə birinci mərhələdir. Yəni, ona Quran oxumağı elə öyrədirsiniz ki, bacısı və yaxud müəlliməsi olmadığında Quranı oxumaq onun üçün asan olsun.
6. Uşaq artıq namazın ona vacib olduğu yaşa dolduqda əzbərlədiyi hissələri namazlarında oxumağı üçün onu buna alışdırın. Fərqi yoxdur fərz namazı olsun və yaxud nafilə.

7. Əzbərlədiyi hissələrə maqnitofon və yaxud kompüterdə qulaq asması üçün onu buna vərdiş etdirin. Bunda məqsəd odur ki, o həm gözəl tələffüzü, həm də gözəl Quran qiraətini eşitsin, təkrarlasın və öyrəndiklərini möhkəmləndirsin.

8. Əzbərləmək üçün uyğun vaxt seçin. Yəni, yayınma halları və diqqətsizliyin az olduğu vaxtlar. Məsələn, fəcr (sübh) namazından sonra və yaxud məğrib ilə işa namazı arasında. Ac, yorğun və yaxud yuxulu olduğu zaman məşğul olmayın.

9. Qonşular və qohumların qarşısında əzbərlədiyi hissələri söyləyərək onu tərifləyin. Bundan məqsəd onu təşviq etmək, həvəsləndirmək və onları da eyni əməli etməyə ruhlandırmaqdır. Eyni zamanda göz dəymə və paxıllıqdan ehtiyat edərək onun üçün Allaha "sığınma” duası (Quranın son 3 surəsi-İxlas, Fələq, Nəs) oxuyun.

10. Həmçinin vacibdir ki, hər dəfə bir dəyişiklik (fərqli yazılış formaları) olmadan eyni Müshəf (Quran) olsun. Bundan məqsəd odur ki, ayələrin quruluşu onun yaddaşında həkk olunsun.

11. Həmçinin, onu təşviq edin ki, əzbərlədiklərini yazsın. Bundan məqsəd isə əzbərlədiklərini möhkəmlədirməklə birlikdə necə yazmağı öryənməyi eyni zamanda cəm etməkdir.

Tövfiq Allahdandır.
Şeyx Münəccid